Mat 22 | NdeIBE | STEP | UJesu wakhuluma kubo njalo ngemizekeliso wathi:

Matthew 22

Umzekeliso Wedili Lomthimba

1 UJesu wakhuluma kubo njalo ngemizekeliso wathi: 2 “Umbuso wezulu unjengenkosi eyalungisela indodana yayo idili lomthimba.

3 Yathuma izisebenzi zayo kulabo ababemenyiwe edilini ukuba beze kodwa bala ukuza.

4 “Yaphinde yathuma ezinye izisebenzi yathi, ‘Batsheleni labo abanxusiweyo ukuthi sengililungisile idili. Ngihlabe izinkabi lezinkomo ezinonisiweyo, konke sekulungile. Wozani edilini lomthimba.’

5 “Kodwa kabakunanzanga lokho bazihambela – omunye waya ensimini yakhe, omunye emsebenzini wakhe.

6 Abanye bazibamba izisebenzi zayo, bazihlukuluza bazibulala. 7 Inkosi yathukuthela. Yathumela impi yayo yababhuqa labobabulali yatshisa idolobho labo.

8 “Yasisithi ezisebenzini zayo, ‘Idili lomthimba selilungile, kodwa labo engibanxusileyo bebengasafanele ukuza.

9 Hambani liye emahlanganweni ezindlela linxuse loba ngubani elimbonayo.’ 10 Ngakho izisebenzi zangena ezitaladini zabutha bonke abantu ezababonayo, abalungileyo lababi, indlu yomthimba yagcwala izethekeli.

11 “Kodwa kwathi inkosi ingena ukuzabona izethekeli yananzelela khonapho indoda eyeyingavunulanga izigqoko zomtshado.

12 Yabuza yathi, “Mfowethu, ungene njani lapha ungelazigqoko zomthimba?’ Indoda yatsha amathe.

13 “Inkosi yase itshela izithunywa zayo yathi, ‘Mbopheni izandla lezinyawo limphosele ngaphandle ebumnyameni, lapho okuzakuba khona ukukhala lokugedla amazinyo.’

14 “Ngokuba banengi ababiziweyo kodwa balutshwana abakhethiweyo.”

Ukuthela KuKhesari

15 Lapho-ke abaFarisi basuka baphuma bayaceba ukuthi bambambe ngamazwi akhe.

16 Bathuma abafundi babo kuye behamba lamaHerodiya. Bathi, “Mfundisi, siyazi ukuthi uyindoda elobuqotho lokuthi ufundisa indlela kaNkulunkulu ngokweqiniso. Kawusuye uthathekile ngoba kawuhugwa yikuthi bangobani.

17 Sitshele-ke, uthini ngalokhu? Kuqondile na ukuthela kuKhesari kumbe hatshi?”

18 UJesu ngokwazi inhloso yabo embi wathi, “Lina bazenzisi, lenzani lizama ukungigwenxa na? 19 Ake lingitshengise uhlamvu lwemali okuthelwa ngayo.” Bamlethela udenariyu,

20 wasebabuza wathi, “Ngumfanekiso kabani lo? Njalo luphawu lukabani lolu?”

21 Baphendula bathi, “NgokukaKhesari.” Wasesithi kubo, “Phanini uKhesari okungokukaKhesari loNkulunkulu okungokukaNkulunkulu.”

22 Bathi besizwa lokhu bamangala. Ngakho baxeka kuye bahamba.

Ukuthathana Ekuvukeni Kwabafileyo

23 Ngalonalelolanga abaSadusi, abathi kakukho ukuvuka kwabafileyo, beza kuye belombuzo. 24 Bathi, “Mfundisi, uMosi wasitshela wathi uma indoda ingafa ingazalanga mntwana, umfowabo kamthathe umfelokazi amzalele abantwana. 25 Kwakulabafowabo abayisikhombisa phakathi kwethu. Wathatha owakuqala wasesifa, kwathi ngoba engazuzanga mntwana watshiyela umkakhe umfowabo. 26 Kwaphinda lokho kowesibili lowesithathu, njalo kwaze kwaba ngowesikhombisa. 27 Ekucineni wafa lowomfazi.

28 Manje-ke ekuvukeni kwabafileyo uzakuba ngumka bani walabo abayisikhombisa ngoba phela bonke babemthethe?”

29 UJesu waphendula wathi, “Liyalahleka ngokuba kaliyazi imiBhalo njalo lamandla kaNkulunkulu.

30 Ekuvukeni kwabafileyo abantu kabayikuthatha loba bendiswe; bazakuba njengezingilosi ezulwini. 31 Kodwa mayelana lokuvuka kwabafileyo – kalifundanga yini lokho uNkulunkulu akutsho kini ukuthi,

32 ‘NginguNkulunkulu ka-Abhrahama, uNkulunkulu ka-Isaka loNkulunkulu kaJakhobe? Kasuye uNkulunkulu wabafileyo kodwa ngowabaphilayo.”

33 Kwathi amaxuku abantu esizwa lokhu amangaliswa yimfundiso yakhe.

Umlayo Odlula Yonke

34 AbaFarisi sebezwile ukuthi uJesu wayesebathulisile abaSadusi, bahlangana ndawonye. 35 Omunye wabo owayeyisazi somthetho wamlinga ngalo umbuzo,

36 “Mfundisi, yiwuphi umlayo omkhulu kulayo yonke eMthethweni?”

37 UJesu waphendula wathi, “ ‘Thanda iNkosi uNkulunkulu wakho ngenhliziyo yakho yonke langomphefumulo wakho wonke langengqondo yakho yonke.’ 38 Yiwo oyingqala njalo odlula yonke imilayo. 39 Owesibili unjengawo: ‘Thanda umakhelwana wakho njengalokhu uzithanda wena.’ 40 Wonke uMthetho labaPhrofethi kweyeme kuyonale imilayo emibili.”

UKhristu UyiNdodana Kabani?

41 Kwathi abaFarisi behlangene ndawonye uJesu wababuza wathi,

42 “Lithini ngoKhristu na? Uyindodana kabani?” Baphendula bathi, “Yindodana kaDavida.”

43 Wathi kubo, “Kungani pho uDavida wathi ekhuluma ngoMoya umbiza athi ‘Nkosi’? Ngoba uthi,

44 “ ‘INkosi yathi eNkosini yami: “Hlala ngakwesokunene sami ngize ngibeke izitha zakho ngaphansi kwezinyawo zakho,” ’

45 Pho, uma uDavida esithi kuye, ‘Nkosi’, angaba yindodana yakhe njani?” 46 Kakho loyedwa owaba lelizwi lokumphendula. Kwathike kusukela ngalolosuku kakho owaqunga isibindi sokumbuza eminye imibuzo.